不死....張國榮(五)

回憶左咁多有關LESLIE既事，今次再講番我第一次睇LESLIE演唱會既感受啦。

時間去返1985年夏天....，初中既我第一次睇我人生中第一個紅館演唱會，仲記得係我哥哥請我去睇(係屋企幾兄弟姊妹一齊去)，仲係張國榮演唱會添，我知道之後簡直開心到瞓唔著添，當然係同學仔面前亦炫耀好耐啦!哈!哈!好緊張呀!仲記得大家係屋企集合晒，就一齊出發囖，我呢D正一鄉下妹，係圍村出九龍喎，一路撘車一路捉實亞哥隻手，幾鬼驚走散呀，我又少撘長途車喎(果時由元朗出九龍仲係行屯門公路，出到旺角又要轉車，總之轉來轉去先至到啦，總之轉到我都唔知邊度打邊度啦!)，所以仲暈住車浪咁去，而家諗番起都覺得自己超低能勁攪笑，哈!哈!去到果度(我都唔知邊度)，我地一班人就先食野，我記得因為仲暈緊車浪關係我只係係食左少少，跟住入埸囖.

入到埸~嘩~好多人呀，~嘩~好大好高呀!我既位置原來係中間以下啩...!咩我地唔係坐前面咩!!???我望住我呀哥哥問，佢話好前架啦!!係我地前面果行都係最貴飛，我地呢行係第二貴飛既第一行0黎架，好前好抵架啦!明唔明呀!??我就一味答 哦!哦!哦!(果時真低能單純呀，咁都信我亞哥講!!)

其實由我踏入紅館果一刻，唔知係咪暈車浪影響，我既腳步已經有D浮，坐低見到銀河沙數既人陸陸續續入場，我呢個鄉下妹已經覺得好勁啦!跟住個SHOW開始時，D觀眾D叫聲嚮到吖，D  BB 聲勁到吖，D掌聲大到吖，好緊張呀，我不停吞口水，心勁跳，手腳勁震，跟住LESLIE一出場，~嘩~ !我哎左出來，跟住覺得自己塊面勁熱勁紅，好驚，好似驚死比人知道係我哎出來，我都話我係一個沉底FANS來架啦，哎下都覺得醜死怪!!(好低能呀..)!
戲肉來啦，我成場都唔知自己係度做咩，淨係覺我個人好浮好飄飄然既感覺，個人覺得超唔踏實，個場好似係咁轉係咁轉咁，我問家姐有無呢種感覺，佢話無喎，叫我清醒D喎，我都唔知做咩，只知自己對眼淨係識望住LESLIE，佢行到邊我對眼就跟到邊，把口無意識咁跟住佢唱，好似發緊夢咁，唔識大哎，咩野到唔識，呆呆咁坐係度，總之形容唔到當時既感覺，總之總之好似係天堂咁既FEEL，超唔實在呀!直到散場，家姐拖我去洗手間，我都浮下浮下咁行去，仲記得對眼仲係望住個台，好攪笑，直到行去撘車返到屋企，我亞爸亞媽問我好唔好睇我都唔識答佢地，又見我成個樣發晒呆咁，嚇鬼死佢地，佢地仲以為我魂魄未返齊，要幫我喊驚添呀，哈!哈!!(其實我既魂魄已經比LESLIE勾左去啦!哈!哈!不過無話比佢地聽之嘛!!!YEAH!!)
我既第一次演唱會，就係咁過，係天堂度中過，好唔真實，好夢境，好浪漫(LESLIE好似只係對住我唱咁)，好飄飄然咁度過........個種感覺講真我仲記得(雖然表達唔到出來)，永世難忘....THANK YOU LESLIE 給了我一個咁美妙既第一次......!!!

        

我果張飛我從來無見過(一路都係我哥KEEP嘛!!)，呢張係好多年後我同事比我留念既，雖然，唔係我果張，但，都好開心架!!(以前D飛好靚架，唔似而家D飛咁，唉!以前唔同價錢飛上面幅相唔同添喎!!)

P.S.我仲記得LESLIE一出場就係呢個做形啦，佢仲話係呢度睇夠就唔駛係出面浪費金錢買佢張POSTER咁話喎!你話幾窩心呢!!!