不死....張國榮(一)

認識我既人都知道我既偶像係LESLIE，記得第一份工D同事叫我做.."榮痴"，果陣時係1989年(哎呀!曝露自己年齡添!算啦!)，其實好細個已經好鍾意LESLIE，記得初中時，知到佢係元朗拍戲，一放學即刻同同學仔坐的士去睇，好興奮、好緊張，日日一聽到放學鐘就一支箭咁飛過去，記得有一次一放學就比班主任捉住，問我0地呢期攪咩0野，一放學就唔見人，我0地話去睇LESLIE，佢聽到之後，雙眼放光，就話佢陣間都要去，仲話我0地點解唔早D通知佢喎，而家諗番起都幾攪笑。

而到89年，我都係啱啱出來市區0既鄉下妹，D同事同我講:咁鍾意LESLIE點解唔去紅館睇佢呀?(果陣時開緊告別演唱會)我就話，我睇左佢告別演唱會啦，而家再買唔到飛啦，點睇呀??D同事就話我死蠢啦，開SHOW前係紅館黃閘門口等佢嘛，佢會拜神 0架嘛，仲可以近距離接觸0架，吓!原來呢個世界有D咁既事0個喎，真係多謝D城市人提點，記得果日我一放工飛奔去紅館睇LESLIE啦，去到又唔知係邊度睇係黃閘喎，咁就戇居居咁係咁揾，六點未夠就一條冷企係度等，記得一路等就一路不停有好多好多人埋來，佢0地仲個手上有好多0野添呀，POSTER、相呀、果籃、雜誌呀咁，我就NOTHING，到六點半左右LESLIE出現呀，嘩!我好緊張呀仲有少少暈添呀，好靚仔呀，佢拜完神仲行過來同我0地簽名打招呼添呀，好NICE!!不敢相信眼前現象，開心死我啦!!!

之後我都有去睇佢拜神，當然醒目左，攞晒POSTER、相呀比佢簽名啦，最記得有一次，因實在太多人啦，所以我企到好遠，同之前一樣當LESLIE拜完神過來簽名時，佢居然第一時間走到我面前幫我簽名先喎(果次我果張係超大用布做0既海報0黎0架)!嘩然我直情成個呆左，佢仲主動問我攞筆，最得人驚我果支筆新買0架，突登買來LESLIE比簽名用0架，仲未開0架，佢好好人除左幫我開筆外(因我傻左唔識反應)，佢跟住同好多人簽名，簽左半個圈後，佢居然返轉頭比番支筆我呀!嘩然神人0黎0架，佢咁都記得支筆係邊個0架，諗番起都覺得好榮幸，LESLIE曾經記得我，可能只係果數分鐘，但，咁夠啦!我已經好滿足好滿足，支筆我當然珍而重之咁收起左。

呢段只不過我對哥哥的一小段回憶，下次再談。

他在我心裡，如從沒離開過。