牛.....

係一亞C個BLOG到見到碗牛肉烏冬，令我有感而發.....

我係一個唔食牛肉既人，點解會咁，咁就要講番我既出身啦.....
大家都知我係一個元朗鄉下妹，家中恭奉既係觀音菩薩，由細到大屋企都未食過牛肉，我細個時問過我亞爸，佢話拜觀音就唔食得牛肉。''哦!!''當時，我既反應就係咁。
直到中學時因係元朗市讀書，就接觸到牛肉呢樣野啦，LUNCH同同學仔食麵，見到同學仔食腩河，哦~好香喎，有流口水FEEL添，當然，係咁既情況下，比同學仔遊說下，食左人我人生中的第一啖牛，仲係牛腩喎，哦~真係好好味呀，又香又淋又滑，之後試左牛肉啦，牛丸咁，感覺就麻麻，始終覺得牛腩先至好味..當然，偷食咁大既秘密，我屋企人唔知啦，不過，我都唔係時時食牛，始終唔係日日走去食腩河呀，牛腩飯架嘛..嘻!嘻!

到我出來工作，我早餐多數食漢堡包，原因...好味又平，其實一路我都唔係幾知原來漢堡包係牛肉做(你話幾鄉下妹吖)，記得有一日，我問老爸點解我地唔食牛肉既，佢就講左以下呢個流傳以久的傳說(神話)??!!

話說係以前，千幾二千年來，人只係用馬來工作，包括拉車，代步及耕田，咁D馬日日勞動被打被鬧好可憐同辛苦，咁亞馬神係天上見到就好心痛，同觀音大士講請求祂幫助，希望祂能說服牛神，派D牛去代替馬既一部份工作，咁觀音大士見到咁樣就去同牛神講，可唔可以幫一幫手，牛神知到之後就去同D牛講可唔可以到凡間幫手，但，D牛話唔可以，因為佢地怕D人會食佢地，咁牛神聽左之後就同觀音講啦，話落去幫手做野唔係問題，但，D人會食D牛架，所以牛神拒絕左，觀音聽左之後就話啦，唔會既，你睇D馬幫左人咁耐，有無人食馬吖，無呀嘛!!所以，放心派D牛去幫手啦，我保證無人食牛既，咁呀牛神聽左之後，就D同牛講，觀音大士保證唔會有人食佢地，因此D牛就相信觀音所以應承落凡間，咁牛神就派D牛落去幫D馬分擔工作啦，但，好可惜呀，D牛落去凡間無耐，D人真係去食牛呀，咁D牛向牛神哭訴，亞牛神就哭住咁向觀音大士投訴，就觀音好慚愧，好傷心同牛神講好抱歉，好對唔住D牛呀，所以，就定左條規例''凡信我者不得食牛''。

故事就到此為止，所以，以後信觀音既人大多數係唔食牛既。
不論呢個故事真假，當我聽完之後，唔知點解有D心痛同開竅既感覺，我地新界人世代務農，牛真係分擔左好多工作，而我真係發覺新界人真係唔食牛既人都幾多架(以前吖)，我係果刻真係有慚愧既感覺，我並唔係一個迷信又或者沉迷宗教既人，我可以話係一個無特別宗教既人(雖然，我屋企裝香拜神)，但，係果刻我同自己講，我以後唔再食牛，人愈大個，觀念更擴大左，而家好多時我都唔係太食肉，當然，未去到食素階段，但起碼初一、十五我都係食齋，漢堡包??!!!好耐未食過囖，所以，好多年都無去過麥記食野囖...，好味既腩河????聞就聞過，而家係麵舖雲吞麵都好好味呀....因此，有時見到D朋友食牛，熟既話，我就講下呢個故仔啦，唔熟既，我就會講唔好食咁多牛呀，燥呀...!!!

咁，我係度就會同大家講...小心瘋牛症呀......^^

有時我會諗..瘋牛症會唔會係個天用來警示大家既啦...??!!